"اسألني واسألك" _ليه عايزة اتجوز_

"اسألني واسألك"

_ليه عايزة اتجوز_

هذه التدوينة ..اهداء مني لاحدي صديقاتي العازفة عن الزواج ..ولصديق من اصدقاء التدوين ,لا اعرفه شخصيا ولكن اقرأ تدويناته حول هذا الامر ..واخيرا ..هي ردا علي تساؤل _حول الزواج ولا زواج_

ليه عايزة اتجوز.. 

. عايزة اتجوز ..علشان معادلة الحياة ..مقسومة علي اتنين ..من يوم ما خلق ربنا حواء  للآدم..والا لو كانت المعادلة بآدم بس معادلة صحيحه..مكنش ربنا خلق له حواء!

.عايزة اتجوز..علشان كل حاجه في الكون ..ماشية اتنين ..اتنين ..حتي الطيور في السماء !

.عايزة اتجوز..علشان عمري ليا لوحدي كتير اوي عليا ..عشان كده عايزه اتقاسمه مع حد تاني !

.عايزه اتجوز..علشان دي طبيعة الكون ..كل حاجه فيه "علي اتنين" الفرح علي اتنين..الحزن علي اتنين ..الالم علي اتنين ..الحمل علي اتنين ..يبقي ليه انا اتحمل كل ده لوحدي لما ممكن يتقسم علي اتنين!

 

.عايزه اتجوز..علشان كل انسان في الدنيا دي كلها..مخلوق ناقص ..وفي حد تاني بيكمله ..يبقي ليه اعيش ناقصه لم ممكن اتكامل مع حد تاني !

.عايزه اتجوز ..علشان الحنان والقوة ..جمب بعض ..المعادلة كده ناتجها مضبوط من غير نقص ولاكسور.

.عايزه اتجوز ..علشان اكيد في حد في مكان ما محتاج لي .. زي ما انا محتاجه له .

.عايزه اتجوز ..علشان أطفالي اكيد محتاجين لي ..واكيد محدش هيجبهم غيري ..محتاجين اعلمهم ..وانقل لهم كل خبراتي ..ومشتاقين يسمعوا حكياتي ..واكيد محدش هيكون احن عليهم مني ..ومحدش هيهتم بيهم غيري!

.عايزه اتجوز..علشان ما عاش ..من عاش لنفسه فقط..وانا مش انانية اوي كده ..علشان اجعل حياتي قاصره بس عليا ..في حين ان ممكن استثمرها مع ناس تانين ..وبعد لما امشي ..يبقي عملي باقي فيهم ..وكأني لسه ممشتش!

 .عايزة اتجوز..عشان الشيطان اقوي علي الفرد ..اضعف علي الاتنين ..يعني لما احيد عن الخط يرجعني ..ولما يحيد ارجعه ..

.عايزة اتجوز ..علشان دي سنه الكون ..واللي بيخالفها يا بيتعب  ..يا بيعمل حاجه غلط ..وانا لا عايزه اتعب ولا عايزه اغلط.

. عايزة اتجوز..علشان لو انا متجوزت ..الكون هينقص اسرة ..وجدهم في حد ذاته تعمير للأرض.

 .عايزة اتجوز..علشان طعم الحياة يكون احلي ..زي طبق السلطة كده بالظبط ..ينفع تعمل سلطة بخيار بس من غير طماطم ؟!..اهو كده بالظبط طعم الحياة من غيري في وجده..ووجدي في غيابه..عشان كده لازم الخيار والطماطم عشان الطبق يكمل ويبقي متوازن .

.واخيرا عايزة  اتجوز..عشان انا بالفستان لأبيض ..وهو بالبدلة السودا..مع بعض اجمل بكتير .

عايزة اتجوز..عشان ..أكمل المعادلة ..

لذا عزيزي المضرب عن الزواج ..وفاكر نفسك بكده بطل ..وبتعمل حاجه مختلفه وفريده عن كل اللي الناس بتعملها ..فأسمح لي أنت واهم.."أنت كده بتخالف سنة من سنن الكون ,واللي بيخالف سنة الكون بيتعب" ..راجع نفسك تاني ..ومتكونش اناني ..وتتهرب من مسؤليات كلفك بها( ربنا سبحانه وتعالي).